Mark 11

Ɓa Ɓe Urushelima

1Sanu ɓa ɓei wu vivi n Baifaji yi n Baitanya yi n Urushelima pyifun, ɓa ɓe Zaitun ʼpe Yesu wa tnu Wo abara n gnu aba.

2Wa gna ɓa ge, “Fye lo kauye yi kwo zhi nu. Shi fye ya kwolo, fye ɓa gye zhaci ɓiyi n gyigni n na to shin kwo gnu m, fya lo kwo ɓe Mi ceyi.

3“N zaho anya fye ɓo fye zhin. Fya ci ge, Eyi, Dagayi n kwo ɓei pma lo, Wo ɓa je tnu n kwoyi sa fyewyi.”

4– 5Aza gnu abahi ɓa kuka ɓa lo ɓa gye zhaci gyigni n zokwo n na duba. Sa n ɓa ɓei lokwo ya aza n ɓa ɓei zhiɓo, ɓa nya ɓa ɓo, “Kni nu zhin fyei lo zhaci ɓiyi ya?”

6Ɓa da shi Yesu ɓei gna ɓa ge ɓa da, azahi ɓa ye ge ɓa lokwo.

7Ɓa ɓe Yesu n zhaci ɓiyi yi owo abara ɓa ya ɓa ʼje kpe n kwo boknu Wa gnutu.

8Nnavun, aza ɓa ɓei zhi ɓo, ɓa ya ɓa ʼje zhi n zokwo n Wa bye. A za ho ɓa gbe a bala fintolo ɓa ɓe ncei ɓa ya zhi Wo n zokwo.

9Wo ɓei dna na ʼza tasin nu, aza n Wa bye, aza n Wavun, oɓa vinya ɓai ɓewyi ɓai cige, “Shekwo mwasa n ʼSu yi! Anabarka danu n ʼzayi n Wo ɓe dna n Dagayi ʼye mi!”

10“Anabarka nu n ʼbeyi Wo ɓe ceyi nyi. Eyi dada, Dawuda ʼɓe. Shekwo ngi Esu!”

11She Wo ɓei lo Urushelima, Wa lo aduwa nyakun, Wa shi aba wye laɓa vinya Wa jegmiya, ntu ge nyipyei ɓei la gashin. Walo Baitanya n Wo abara awo-cei-aba yi.

12N labmi yi shi ɓa ɓei fa Baitanya, Wa wo mikun yi gnu Wo.

13Shi Wo ɓei shi awye n Wo abye fyewyi, Wa gye gbayi shinwa gni na fintoloyi ci kpe Wa lo kpekni Wa gye kwo gyi kpe. Ama wa bwa a fintolo nu gye kpe. Ntuge ʼsa to ɓeyi si n kwo ɓa gyi m.

14N sayi Yesu wa tu gbayi hi kni, “Ho ta shan gyi n jesun m.” Owo abara ku wo woi da lonu.

15Sanu ɓa ɓei si Urushelima, Wa lo aduwa nyakun Wa nya aza ya n ɓa ɓei fyi ɓai knu anya fyi na duwa nyakun. Wa ce agylwye shanyi tebul abwa ya. Wa nya a likpe knuyi ya.

16To Wa ye ge zaho-zahoi lo ɓe na kaya knu-knuyi m.

17Wa gna ɓa ge, “Acei ka dna n Litafi, ‘Emi nyakun zhin aduwa zhin ba nu ntu nanyi vinya ɓo,’ ama fye la kwo ze avi nyakun.”

18She a pirist na Yahudawayi tukwodayi ɓei wo nya Wa zhin, ɓa ya shiri zhin she ɓa ba wan Wo. Oɓa wahala gmanyi nu ɓa ɓo wo gyikici dna. Ntu ge aza ɓei n ɓahin yi gagayi da Yesu nya wu ɓo.

19Nwyeshe yi shi ɓa shin zhin, ɓa fa ezhi yi ho.

20Nlabmiyi, sanu Wo abara ɓei du gbayi hi ya n Wo ɓei tukwo kni nyi, ɓa gye kwo la afintolo woya n ku bwa har agbegye.

21Nsayi, Bitrus wa pa nya Yesu ɓei gna shinwahi n nyipyei avun nya nyi, wa cige, “Male, gyewye, gbayi n Ho ɓei tu kwo kni nyi, kwo ku bwa.”

22– 23Wa dna ɓa ɓe gbe Wa cige “Ndei fye n gaiciya gayi lo n Shekwoyi, gaciciya nu Mi gnafye fye ɓa mi fya ci Zaitun ʼpe ge laka ha kadna n ʼla. Tilas kwa vi fye ɓeda. Nya na ye kwonu nyi la gaiciya ga, to ha zhin abugba gnu abam.

24“Fye wo Mi! Fye ɓa zhin aduwa ntu nyaho-nyahoi ɓo, ndei fye ga gaiciya ge fye la kwo bwa, kwo zhin fye nya nu.

25“Ama sanu fye zhin aduwa, zhin eza n ho woi shi bugba gafara nnabai efye Dada n Wo tu she nyi Wa zhin fye laifi gafara ce.”

26– 27– 28 ▼

▼The text of verses 26-Mrk 11:28 has been merged.

Nsa deye ɓai ku si Urushelima njesun. Shi Wo ɓei zanzan lo n na duwa nyakun ba, a pirist tukwoda n na Yahudawayi tukwoda yi, ɓa ɓe wo aba ɓa nya Wo ɓo “Knihin nu zhin ya? Nyikana ga Ho iko ge Ho nya anyaknuyi ya na duwa nyakun a?”

29– 30Yesu wa ciɓa ge, “Mi ɓa dna fye ɓe gbe n fya ga Mi ɓenya ye awyega. Yohanna Baptisma zhin yi ma, Shekwoyi nu ɓei tnu n woi, kwo awo? Fye dna Mi ɓe gbe.”

31Ɓa da kwo ɓahin-ɓahin, “N ya cige Shekwoyi nu ɓei tnu n woi. Wa ci yi ge, ʼKni nyi nu ɓei zhin to fya gwo wo ma?”

32N ya cige Shekwoyi nu to ɓei tnu n woi m, aza tafa yim. (Ntu ge aza ga gaiciya n kalai ge Yohanna bei zhin anabi nu.)

33Ntu lonu ba cige, “yi ta kpe genyi lom.” Yesu wa gnaɓa ge, “Ntu cenu Mi ta ga fye ɓenya amsa cem.”